رجع المطرب الشعبي أحمد شيبة بقوة للساحة، وقدر يخطف أنظار الجمهور من جديد بأغنيته الجديدة "أنا مش تمام" اللي حققت ربع مليون مشاهدة خلال ساعات قليلة من طرحها على يوتيوب، وده بعد غياب ملحوظ عن المشهد الفني.
الأغنية لفتت الأنظار مش بس علشان رجوع شيبة، لكن كمان بسبب كلماتها القوية والمؤثرة اللي لامست قلوب كتير من الناس، خاصة وإنها بتدور في إطار درامي حزين يعكس وجع داخلي وصراع نفسي واضح.
شيبة غنى وكأنه بيحكي قصة حد موجوع بجد، بيتألم ومش لاقي مخرج، وده ظهر في كلمات الأغنية اللي قالت:
"أنا مش تمام..
أنا بس عايش والسلام..
بسكت وحاسس بأكتئاب..
...
ماشي في مرار مالهوش ختام.."
الأغنية من كلمات عماد عبيد، ألحان خالد سلطان، توزيع طه الحكيم، وميكس وماستر محمد جودة.
نجاح الأغنية بالشكل ده مش غريب على أحمد شيبة، اللي دايمًا بيعرف يختار اللي يوصّل بيه إحساسه للجمهور، وده يمكن سر تعلق الناس بيه، سواء في الأغاني اللي بترقصهم أو في الأغاني اللي بتوجع قلوبهم.
"أنا مش تمام" مش مجرد أغنية جديدة، دي رسالة وجع وصوت ناس كتير مش لاقية تهون على روحها، وشيبة كان لسان حالهم.