مصارع الأولمبياد على النار.. كرم جابر يكشف سر المكرونة بالسي فود في رمضان
في رمضان، كل نجم ليه حكاية مش بس في الملعب، لكن كمان في المطبخ! والمفاجأة النهارده بطل من نوع خاص، مش بس بيصارع على البساط، لكن كمان بيعرف يصارع في المطبخ ويحضر لنا أكلة مميزة جدًا.
النهاردة فقرة "الكابتن في المطبخ" هتنور مع أسطورة المصارعة كرم جابر، صاحب ذهبية أولمبياد أثينا 2004 وفضية لندن 2012، واللي قرر يشارك جمهوره واحدة من وصفاته المميزة لمائدة رمضان: المكرونة بالسي فود على طريقة الأبطال.
المقادير اللي هتخليك بطل المطبخ:
كيلو مكرونة نصف كيلو جمبري نصف كيلو كاليماري جندوفلي أصابع أخطبوط توابل (ملح - فلفل أسود - كمون - بهارات سمك) 2 كوب عصير طماطم بصلة متوسطة قليل من الزيت
الطريقة سهلة وبسيطة: كرم جابر بدأ بغسل السي فود كويس، وفصل كل نوع لوحده. بعد كده سلق المكرونة وركنها على جنب. في طاسة تانية، شوّح البصل في الزيت لحد ما لونه تغيّر، وأضاف عصير الطماطم وبهارات السمك وسبهم يتسبكوا.
وباحترافية المصارع، بدأ يسلق الجمبري نص سلقه، ويشوحه في الزيت مع الكاليماري والجندوفلي وأصابع الأخطبوط. وأخيرًا قلب كل المكونات مع الصلصة والمكرونة عشان تكون جاهزة للأكل.. أكلة بجد فيها روح البطولة!